Paperezkoak - Azken Alea
Laster baten

Ariketa fisikorako eskaintza handia udal ikastaroetan

Hipopresiboak, Mantenimentuko gimnasia, Pilates, Yoga, Zunba... ariketa fisikoan oinarritzen diran ikastaroak daukie arrakastarik handiena Arratian eta horreexek osotuten dabe udalak 2018-2019 ikasturterako egin daben eskaintzearen gehiena.

 

BEGITUren aurreko zenbakian, Bediak, Dimak eta Lemoak eskaintzen dituen ikastaroen barri emon genduan. Hona, Arantzazun, Areatzan, Artean, Zeanurin eta Zeberion eskaintzen diranak dakarguz. Izena emoteko epea hilaren amaierara arte zabalik dago gehienetan.

Arantzazu
Arantzazun ikasturte osokoak dira ikastaroak, eta ariketa fisikoa egiteko aukerak erraztu gura deutseez arantzazuztarrai. Mantenimentuko gimnasia, Zunba, Spinning eta Entrenamentu funtzionala dira Udalak eskainitako ikastaroak. Izena emoteko epea zabalik dago hilaren 20ra arte.

Areatza
Areatzak Zunba, Zunba txiki 12 eta 16 urte bitartekoentzat, Gimnasia, Eskulanak, Crossfit, Pilates, Euskal jantzak, Yoga eta GAP ikastaroak eskaintzen ditu. Ikastaroak aurrera aterateko gitxienez 10 personako taldeak osotu beharko dira. Prezioai jagokienean, Euskal jantzak ikastaroa debaldekoa da, Yogak 80 euroko prezioa dauka eta gainontzekoak 110 eurokoa. Izena hilaren 22ra arte emon ahal da udaletxean.

Artea
Artean, Eskulanak, Arte aplikaduak, Zunba, Edadekoentzako gimnasia, Yoga, Pilates, Euskal jantzak umeentzat, Jantza modernoa eta Txi kung ikastaroak egin ahal izango dira. Ikasturte osorako dira eta prezioak 40 eurotik 120 eurora bitartekoak.

Zeanuri
Zeanuriko Udalak eskaintza zabala egin dau aurten be: jarduera fisikoko ikastaroak, arteari lotutakoak eta edadekoai zuzendutako bat. Pilates, Zunba, GAP, Entrenamentu funtzionala, Txi kung, Gimnasia, Hipopresiboak eta Luzaketak dira jarduera fisikoari lotutako ikastaroak. Pinturea eta josten be ikasi daiteke ikasturte honetan. Edakoentzako gimnasia klaseak be eskaintzen ditu Udalak. Gimnasiako klaseak urri lehenengoaren 5ean hasi ziran, Pilates, Zunba, GAP, Luzaketak, Edadekoen gimnasia eta Entrenamentu funtzionala hilaren 17an hasiko dira eta gainontzekoak urri bigarrenean.

Zeberio
Datorren hilean beste ikastaroren bat be sortuko dalakoan, momentuz altzariak zaharbarriztatzeko ikastaroa eta euskerea ikasten dabenai diru laguntzea eskaini deutse Udalak. Altzariak barriztatzeko ikastaroak arrakasta handia izaten dau Zeberion. Igaz ezin izan zan egin, baina aurten barriro antolatu dabe Leire Sagarduiren eskutik. Udalak matrikulearen %40ko diru-laguntzea emongo dau eta izena urri bigarrenaren 1era arte emon daiteke udaletxean.
Euskerazko ikastaroai jagokienean be, ikastaroa antolatu baino, Bizkaiko euskaltegietan matrikuletan diranai diru-laguntzea emongo deutse. Diru laguntzak jasoteko izena urri lehenengoaren 28ra arte emon daiteke udaletxean.

Igorreko Euskera Planeko Inbiu Eguna hilaren 22an

Urtero legez, jai giroan ospatu eta aldarrikatuko dabe euskerea Igorren Inbiu Egunean. Euskereagazko konpromisoa bultzatzeko helburua daukan erronka handia ez da faltauko.

Udal iturrien arabera, erronkeak herri guztia batuko dau eta umorez beteko dau Agirre Lehendakaria kalea. Zer izango dan ez dabe argitu gura izan.
Jaia, urri lehenengoaren 22an izango da. Eguerdiko 12:00etan hasiko dira ekitaldiak, kalejira bategaz. Kalejirea, EinGO Kantan eta Dantzan taldeak eta Maurizia, Leon eta Fasioren erraldoiak animauko dabe. Ondoren, 13:00etan, izango da ekintza nagusia, "erronka erraldoia" Agirre Lehendakaria kalean.
Hiruretan, bazkaria Kultur Etxeko plazan, eta bazkalostean, EinGo taldeagaz kantaldia.
Erromeria, 18:30etik aurrera izango da Igorrekoa dan Jokaldi taldeagaz AMEk antolatuta eta erromeria bitartean txokolatea bananduko da.

Bazkaria
Inbiu Egunean egingo dan bazkarirako txartelak hilaren 19ra arte erosi leitekez Gau Lora, Ezkiña eta Jubiladuen tabernan. Helduak 14 euro ordaindu beharko dabe eta 12 urtera artekoak 9 euro. Helduen menua, marmitakoa, solomoa piperrakaz, tartea izozkiagaz, ardaoa eta kafea izango da eta gaztetxoena makarroiak, solomoa patatakaz eta izozkia. Antolakuntzakoak bazkarira txartel barik ez joateko eskatu dabe.

Argazki Lehiaketea

Urtero lez, gure Argazki Lehiaketan parte hartu eta zuen biajeetan aterako argazkiak, irakurle guztiakaz konpartiduten konbidatzen zaitue BEGITUk. Betiko lez, irabazleentzat sariak egongo dira.

Argazki lehiaketearen oinarriak:
1.- Parte hartzaileak: BEGITU Aldizkaria jasoten dauan edonor.
2.- Gaia: Argazkiak 2018 urtean egindako biajeetan edo oporretan egindakoak izango dira.
3.- Lanen ezaugarriak: Aurkezten diran argazkiak, non, nok eta noz atera diran esan behar da. Gehienez 3 argazki bialdu ahal izango dira personako.
4.- Nora bialdu: Argazkiak begitu@topagunea.com helbidera bialdu behar dira.
5.- Aurkezteko epea: 2018ko garagarrilaren 2tik urri lehenengoaren 25era arte aurkeztu daitekez argazkiok. Abuztua eta urri lehenengoko zenbakietan argitaratuko dira batzuk.
6.- Epaimahaia: BEGITU Aldizkariko erredakzino taldeak osotuko dau.
7.- Epaia: Epaimahaia urri lehenengoaren bigarren hamabostaldian batuko da epaia emoteko eta urri bigarrenean argitaratuko da.
8.- Lehenengo saria: Persona birentzako astegoien bat Euskal Herriko landetxe baten. Sari gehiago egon daitekez, epaimahaiak egoki jo ezkero.
9.- Oharra: Lehiaketa honetan parte hartzean dabenak honeek oinarriok onartuten dabezala esan gura dau.

Hamazortzi ermita ikusteko aukerea emoten dauan ibilaldia antolatu dabe Diman

Urri lehenengoaren 22rako antolatu dau Dimako Udalak, Dimako 18 ermitatik pasetan dan ibilaldia. Guztira 32 kilometro dira, baina ibiltariak ibilbide osoa edo zati bat egiteko aukerea be badaukie. Urtekerea, goizeko 07:00retan izango da herriko plazatik. Martxea amaitutakoan kopaua egongo da martxan parte hartu dabenentzat.
Ibilbidea igazko bera izango da eta hurrengo leku eta ermitetatik pasauko dira ibiltariak: Herriko plazea, Piedadea, San Pedro parrokia, Artzubi, Munetxa, San Migel Txiki, Iraurgi, Olazabal, Roke Deuna, Untzurdin, Arostegieta, San Inazio, Lamindao, Magdalena, Petralanda, Goikogana, San Blas urriko, Elgabide, Urzabaleta, Kortabarria, Zamakola, Olalde, San Fresku, Gibiltar, Jentilzubi, Abaro, Baltzola, Lontzo Deuna, Bargondia, Santa Mañe, Santa Apolonia, Bargaun, Egiraun, Zubero, Oba goikoa, San Antolin, San Martin, Ugariotz, Artaun, Bizente Deuna, Bikarregi, Santa Ageda, Bizkorna, Biteriño, San Millan, Santiago, San Balentin eta herriko plazea.

Arrabatik pasauko dira Areatzako Mendi Martxako ibilbide biak

Urri lehenengoaren 22an izango da Areatzako VII. Mendi Martxea. Aurreko urteetan moduan ibilbide
bi izango ditu. Luzeak 28 kilometro ditu eta 1.500 metroko desnibel positiboa eta laburrak 20 kilometro eta 750 metroko desnibela.

Martxa laburrean parte hartzean dabenak, antolakuntzak autobusez igongo ditu Bikotxganera, desnibela kendu eta martxako zatirik politenak egin dagiezan. Urtekerea 08:00retan izango da herriko plazan.
Ibilbide luzea Areatzatik urten eta Atxeko, Martxondi, Perretxiko zabala, Upo, Asteitze, Mendigana, Hirumugarrieta, Pagomakurre, Atxulo, Areatzako neberoa, Potxoleta, Arraba eta Karkabitxuetatik pasauko da barriro Areatzara heltzeako.
Ibilbide laburrari jagokonean, ibiltariak autobusez joango dira Bikotxganera eta handik, Mendigana, Hirumugarrieta, Pagomakurre, Atxulo, Areatzako neberoa, Potxoleta, Arraba eta Karkabitxuetatik pasauko dira martxea Areatzan amaituteko.
Martxan zehar jan-edan puntu bi egongo dira eta amaitutakoan parrilladea partaideentzat.

Izen emotea
Izena hilaren 20ra arte emon daiteke areatzakomartxa.blogspot.com webgunean edo egunean bertan plazan 07:15etik aurrera. Prezioa 8 eurokoa da aldez aurretik izena emon ezkero, eta 12 eurokoa egunean bertan. Prezio barruan, kamiseta teknikoa jaso eta zozketan parte hartuko dabe izena emoten dabenak. Areatzako Hotel Balnearioan gau bat eta Atxarte kirol dendako materiala zozketatuko dira.
Areatzako Udalak, AKKBk, Lamino Kirol Klubak eta Frakazuri Gazte Asanbladeak antolatu dabe mendi martxea.

Arteatik Laguardiara bertsotan

Oporren ostea gogorra dala esaten dabe; bada, aldats gora hori apur bat samurtuteko bodega batera joatea aukera ona izan daiteke. Izan be, Arteako Jubiladuen Alkarteak Laguardiara bertso-txangoa prestatu dau Udalaren laguntzeagaz.
Urri lehenengoaren 22an 09:30ean izango da urtekerea Arteatik bertatik. Izena Arteako udaletxean emon behar da urri lehenengoaren 18ra arte. Herrian erroldatutakoak 30 euro ordaindu beharko dabe eta ez erroldatutakoak 40. Prezioaren barne dagoz autobusa, bazkaria, Launa bodegara bisitea eta hamaiketakoa, baita Fredi Paia eta Arkaitz Estiballesen bertso saioak be.

Karpa azpiko antzerkia Diman Nicole & Martin konpainiaren eskutik

Hilaren 20tik 23ra, Grimm anaien ipuinetan oinarritutako lau antzezlan eskainiko ditu Nicole & Martin antzerki konpainiak Diman.

Lehenengo biak eskolaumeentzat ingelesez eta beste biak publiko orokorrarentzat gaztelaniaz.
Urri lehenengoaren 17an helduko da Dimara Nicole Gubler Scharnz eta Martin Gluberren konpainia. Herriko jenteak lagunduta, karpa zuria montauko dabe Dimako eskola eta frontoiaren arteko zelaian. Emonaldiak, eguenean, hilak 20, hasiko dira. Egun horretan, eskolaumeak Hansel eta Gretel ingelesez ikusteko aukerea izango dabe goizeko 11:00etan, eta hurrengo egunean, Juan Burdinezkoa. Publiko orokorrari zuzendutako lehen lana, Eskurik ez zuen neskamea izango da, gaztelaniaz. Zapatuan izango da, hilak 22, arrastiko 19:00etan eta sarrerak euren webgunean erreserbau eta takilan hartu ahal izango dira. Domekan, 12:30ean izango da emonkizuna, Arrantzalea eta emaztea antzeztuko dabe orduan.
Domeka arrastian karpea desmontetan hasiko dira hurrengo astelehenean Granadarantza joateko. Izan be, konpainia honetakoak karabanetan bizi dira eta "urtean zortzi hilabetez Europan zehar ibilten gara antzerkiagaz" dinoe euren webgunean.

Ikasle Euskaldun Eleanitzak Proiektuaren barruan
Konpainia Dimara etorteak Dimako eskoleak Udalagaz alkarlanean antolatu dau. Diman Ikasle Euskaldun Eleanitzak Proiektuan dabilz lanean eta Ikastetxeko Hizkuntza Proiektua osotu eben joan dan ikasturtean. "Horren ildotik, aukera parebakoa subertau jakun: eleanitzak diran antzezle honeei gure herriko ateak zabaltzea. Emonaldi bi ingelesez egingo ditue eta beste bi gazteleraz. Gure erronkea hauxe da: eurak hurrengo baten antzerkiren bat euskeraz egiten animetea. Geure laguntzea gura badabe, eukiko dabe" dino Olaia Gurtubai eskolako zuzendariak.

Presoen aldeko Argazki Lehiaketea antolatu dau Axular Kultur Elkarteak

Lehiaketan parte hartzeako hondartzan, mendian edo urian egindako argazkiak bialdu daitekez urri lehenengoaren 23a baino lehen axularke@gmail.com helbidera. Egile bakotxak gehienez argazki bi bialdu ahal ditu eta argazkiakaz batera izena eta telefono zenbakia ipini behar dauz mezuan. Irabazleak Hatortxu Rock jaialdirako sarrera bi jasoko ditu saritzat.
Irabazlea botazinoaren bitartez aukeratuko da. Gura dauanak botoa emon ahal izango dau Facebook edo Instagram-en eta Axularren egingo dan argazki erakusketan urri lehenengoaren 24 eta 30a bitartean.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD